Müstəqilliyin 20 illik yubileyi çərçivəsində uşaqlar arasında müsabiqə keçiriləcək
Azərbaycan Respublikasının müstəqilliyinin bərpasının 20 illik yubileyi çərçivəsində Bakı şəhərinin məktəbəqədər təhsil müəssisələrində tərbiyə alan uşaqlar arasında “Bilik, bacarıq və qabiliyyət” müsabiqəsi keçiriləcək.
Bakı şəhəri üzrə Təhsil İdarəsinin ictimaiyyətlə əlaqələr şöbəsinin müdiri Zəminə Əliqızı bu barədə məlumat verib. O bildirib ki, müsabiqə “Xüsusi istedada malik olan uşaqların (gənclərin) yaradıcılıq potensialının inkişafı üzrə Dövlət proqramı (2006 - 2010), Azərbaycan Respublikasında “Məktəbəqədər təhsilin yeniləşdirilməsi proqramı (2007 -2010) və “Təhsil haqqında” Qanunun tələblərinə müvafiq uşaqların meyl, maraq, qabiliyyət, bacarıq və istedadlarını üzə çıxartmaq, onların gələcək inkişafını təmin etmək məqsədi ilə təşkil olunur.
Z.Əliqızının sözlərinə görə, musiqi, nitq mədəniyyəti, sadə riyazi təsəvvürlərin inkişafı və rəsm nominasiyaları üzrə təşkil olunacaq müsabiqə mart, aprel, may aylarını əhatə edəcək: “ 5-6 yaşlı uşaqların intellektual, sosial-mənəvi, estetik və psixoloji cəhətdən inkişafını, dərk etmə və nitq qabiliyyətlərinin səviyyəsini müəyyən etmək məqsədi daşıyan müsabiqədə hər 4 nominasiya üzrə məktəbəqədər təhsil müəssisələrində təşkilat komitəsi və münsiflər heyəti yaradılacaq. Nominasiyalar üç - bağça, rayon, şəhər mərhələsi şəklində təşkil olunacaq. Qaliblər Bakı Şəhəri üzrə Təhsil İdarəsinin xüsusi hədiyyə və diplomları ilə təltif olunacaqlar”.//sia.az
Müstəqilliyin 20 illik yubileyi çərçivəsində uşaqlar arasında müsabiqə keçiriləcək
