“Uşaq hüquqları” aylığı çərçivəsində növbəti tədbiri Ombudsmanın Gəncə regional mərkəzinin əməkdaşları Gənclər və İdman Nazirliyinin Göygöl Rayon təşkilatı ilə birlikdə bu rayondakı Gənclər Evində təşkil ediblər. Ombudsmanın nümayəndələri 12 Noyabr – Konstitusiya günü münasibətilə iştirakçıları təbrik edib, xoş arzularını bildiriblər. Ölkənin əsas qanunu olan Konstitusiyanın müddəalarının üçdə bir hissəsinin insan hüquq və azadlıqlarına həsr olunduğu, dövlət siyasətində uşaqlara xüsusi diqqət yetirildiyi, onların hüquqlarının müdafiəsi və təmini istiqamətində mühüm tədbirlərin həyata keçirildiyi vurğulanıb.
Regional mərkəzin əməkdaşları hazırda ölkənin müxtəlif regionlarında, o cümlədən Gəncə şəhərindəki 39 və Göygöl rayonundakı 4 saylı orta məktəblərdə şagirdlərin iştirakı ilə uşaq hüquqları üzrə pilləli tədrisin həyata keçirildiyini söyləyiblər. Tədbir iştirakçılarına təsisatda uşaq hüquqları ilə bağlı yaradılmış 916 saylı qaynar xətt barədə də ətraflı məlumat verilib.
