Bu gün Bakıda Dövlət Neft Şirkətinin (ARDNŞ) dəstəyi ilə Azərbaycan Diplomatik Akademiyasının (ADA) Yay Enerji Məktəbi çərçivəsində “Xəzər təbii qazı: cari tendensiyalar və gələcək ssenarilər” mövzusunda konfrans keçirilir.
Konfransda çıxış edən ARDNŞ prezidenti Rövnəq Abdullayev son altı ildə Azərbaycanın təbii qaz ehtiyatının artımından bəhs edib.
O, hazırda ARDNŞ-in təkbaşına “Ümid” yatağının işlənməsini həyata keçirdiyini vurğulayaraq, bu yatağın 200 milyard kubmetr qaz və 40 milyon ton kondensat ehtiyatına malik olduğunu açıqlayıb. R.Abdullayev deyib ki, Azərbaycanda 40-a yaxın təbii qaz strukturu var və 2015-ci ildən etibarən il ərzində 30 milyard kubmetr qaz çıxarılacaq. ARDNŞ rəhbəri hazırda AGRİ, İTGİ və “Nabucco” layihələrində iştirakın nəzərdən keçirildiyini də xatırladıb.
Tədbirdə ADA-nın rektoru Hafiz Paşayev Yay Enerji Məktəbində 17 ölkədən 41 nümayəndənin iştirak etdiyini açıqlayıb. Konfransda bir sıra xarici ölkələrin ölkəmizdəki səfirləri ilə yanaşı, xarici ekspertlər də iştirak edirlər.
Tədbir ekspertlər səviyyəsində sabah da öz işini davam etdirəcək.\\azadinform
“Xəzər təbii qazı: cari tendensiyalar və gələcək ssenarilər” mövzusunda konfrans keçirilir
