23-30 aprel

Şura Yevlaxda innovasiya siniflərinin yaradılmasına da dəstək verir
Yerləşdirilib: 29.04.11 |

Azərbaycan Gənc Alim, Aspirant və Magistrlər Cəmiyyəti (AGAAMC) Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə “İstedadlı şagirdlər üçün İnnovasiya Siniflərinin (İnnovation Classrooms) yaradılması” layihəsinin birinci mərhələsi çərçivəsində Yevlax şəhərində, 28-29 aprel 2011-cu il tarixində 5 orta məktəbdən 50 nəfər istedadlı orta məktəb şagirdi və təhsil işçilərinin iştirakı ilə seminar həyata keçirmişdir. Seminar Yevlax şəhəri H.Əliyev prospekti 66 ünvanda, Yevlax Təhsil şöbəsinin akt zalında baş tutub. Bu barədə məlumatı qhtxeber.az-a təşkilatın sədri, layihənin koordinatoru fəlsəfə doktoru İlqar Orucov məlumat verib. Seminarın əsas məqsədi şagirdlər üçün İnnovasiya Sinifləri təcrübəsini inkişaf etdirməklə Azərbaycan dövlətinin istedadlı uşaqların inkişafı ilə bağlı siyasətindən irəli gələn prinsiplərin həyata keçirilməsinə əlavə töhfələr vermək, istedadlı uşaqların təşkilatlanması və istedadlı uşaq kapitalının formalaşdırılmasına yardımçı olmaq, onların qeyri-formal təhsil almasına, zehni oyunlar (puzzle party) üzrə ixtiraçılıq potensialının inkişafına dəstək vermək, istedadlı şagirdləri XXI əsrin yeni yaradıcı ixtisaslarına yönləndirməklə onların imkan və bacarıqlarının reallaşmasına şərait yaratmaq, təhsildə yeni bir təcrübənin əsaslarını formalaşdırmaq olmuşdur.

16-22 aprel

Şuranın maliyyə dəstəyi ilə ehtiyacı olan gənclərə peşə hazırlığında kömək olunacaq

Yerləşdirilib: 17.04.11
Şəhid ailələrinə maddi və mənəvi dəstək” İctimai Birliyi Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının malıyyə dəstəyi ilə “Ehtiyacı olan gənclərin peşə hazırlığının artırılması” layi¬hə¬sinin icrasına başlamışdır. Bu barədə “Şəhid ailələrinə maddi və mənəvi dəstək” Icimai Birliyinin sədri Nəzakət Həsənova məlumat verib. 

Layihənin əsas məqsədi Bakı şəhərində yaşayan şəhid, əlil, qaçqın ailələrinin və valideyn himayəsindən məhrum olumuş yeniyetmələrə qloballaşan müasir dünyanın tələblərinə uyğun kompyuter texnologiyası, bərbər (kişi-qadın) və dərziçilik peşələrinin öyrədilməsidir.

Təşkilatın rəhbəri bu məqsədə nail olmaq üçün həyata keçiriləcək tədbirlər haqda məlumat verib. O bildirib ki, ilk olaraq Bakı şəhərində yaşayan və ehtiyacı olan şəhid, əlil, qaçqın ailələri və valideyn himayəsindən məhrum olmuş yeniyetmələrin problemləri ilə maraqlanacaqlar. Bundan başqa Bakı şəhərində yaşayan 40 nəfər ehtiyacı olan şəhid ailələri və valideyn himayəsindən məhrum olmuş yeniyetmələrə kompyuter kursları, o cümlədən, bərbər (kişi-qadın) və dərziçilik kurslarına cəlb ediləcək, şəhid, əlil, qaçqın ailələri və valideyn himayəsindən məhrum olmuş yeniyetmələr ilə bilavasitə təlimlər keçiriləcək, kurslar bitdikdən sonra onlara donor və icraçı təşkilatların birgə hazırlanmış sertifkatları veriləcək.

Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasında BMT İqtisadi-Sosial Şurasının (ECOSOC) QHT-lər üzrə bölməsinin rəhbəri Andrey Abramovla ölkənin bir sıra aparıcı QHT rəhbərlərinin görüşü keçirilib.

Qonağı görüş iştirakçılarına təqdim edən Şura sədri Azay Quliyev Azərbaycan QHT sektorunun vəziyyəti, son illər ölkədə QHT layihələrinin dövlət büdcəsindən maliyyələşdirilməsi, eləcə də Azərbaycan QHT-lərinin beynəlxalq strukturlarda təmsilçiliyi haqqında məlumat verib. A.Quliyev qeyd edib ki, dünyaya və Avropaya inteqrasiya baxımından ölkəmizin qarşısında duran böyük vəzifələr, vətəndaş cəmiyyətinin möhkəmləndirilməsi, Qarabağ münaqişəsilə bağlı məsələlərin həlli QHT-lərin beynəlxalq qurumlara, xüsusilə BMT strukturlarına inteqrasiyasını şərtləndirən başlıca amillərdir.

A.Abramov ölkəmizə dəvətə görə Beynəlxalq Avrasiya Mətbuat Fondunun sədri Umud Rəhimoğluna təşəkkür edərək, Azərbaycandan hələlik yalnız 5 QHT-nin BMT İqtisadi-Sosial Şurasına (ECOSOC) üzv olduğunu və bu təmsilçiliyin gələcəkdə daha da gücləndirilməsinin vacibliyini bildirib.

Görüşdə çıxış edən QHT rəhbərləri Umud Rəhimoğlu, Əhməd Qəşəmoğlu, Vüsalə Hüseynli, Pərvin Məmmədova, Novella Cəfəroğlu, İsrail İsgəndərov, Səidə Qocamanlı, Rauf Zeyni, Səadət Bənəniyarlı, Vahid Qazi və başqaları bu nüfuzlu BMT strukturu ilə əməkdaşlıq haqqında öz fikirlərini bildirdilər. BMT-nin Azərbaycandakı təmsilçiliyinin yerli QHT-lərlə əlaqələrinin gücləndirilməsi, Dağlıq Qarabağ münaqişəsinin həlli naminə icma təmaslarının artırılması, qaçqın və məcburi köçkünlərin sosial problemlərinin qarşılanması, BMT strukturları vasitəsilə başqa ölkələrin iş təcrübəsinin öyrənilməsi və başqa məsələlər barədə əməkdaşlıq haqda fikir mübadiləsi aparılıb.

9-15 aprel

QHT-lər sağlam həyat tərzini paytaxtdan regionlara daşıdı

Yerləşdirilib: 11.04.11

9-11 aprel 2011-ci il tarixdə “NUR” Uşaq və Gənclərin İctimai Birliyi, MTV Staying Alive Fondu və Azərbaycan Gənclərinin AİDS-lə Mübarizə Koalisiyası “Uşaqların Göy Qurşağı: HİV/AİDS Maarifləndirməsi paytaxtdan regionlara” adlı Həmyaşıddan-həmyaşıda Təhsil layihəsi çərçivəsində HİV/AİDS Maarifləndirməsi mövzusunda təlim keçirilib. Təlimin keçirilməsində başlıca məqsəd gənclərə sağlam həyat tərzini aşılamaq və HİV/AİDS barədə məlumatlılıq səviyyəsini artırmaqdır. Təlimdə 14-20 yaşlı 30 gənc iştirak etmişdir və iştirakçılar diplomla təltif olunub.
“Uşaqların Göy Qurşağı: HİV/AİDS Maarifləndirməsi paytaxtdan regionlara” adlı Həmyaşıddan-həmyaşıda Təhsil layihəsi çərçivəsində növbəti tədbir - Azərbaycanın Regionlarına Avtobus Turu bu ilin may ayında təşkil olunacaq.

“NUR” UGİB HİV/AİDS-in önlənməsi sahəsində fövqəladə xidmətlərinə görə MTV Staying Alive Fondu tərəfindən 2008 və 2009-cu illərdə “STAYING ALIVE AWARD” mükafatı ilə təltif olunub. 2009-cu ildən etibarən MTV Staying Alive Fondunun dəstəyi ilə həyata keçirilən “Uşaqların Göy Qurşağı: HİV/AİDS Maarifləndirməsi paytaxtdan regionlara” adlı Həmyaşıddan-həmyaşıda Təhsil layihəsi 2012-ci ilə qədər davam edəcək.